منال سعيد
قبل ما تسلقي الفاصوليا البيضاء… اسمعي مني الكلمتين دول! 👌🏻❤️
في ناس بتشتكي إن الفاصوليا البيضاء لما تيجي تطبخها بتلاقي حبة ناشفة وحبة مكرمشة،والتانيه طريه أو القشرة بتتفصل عن الحبة!
النصيحة دي عن تجربة: انقعي الفاصوليا في مياه ساقعة ليلة كاملة، ولو عندك كمية كبيرة تقدري تحتفظي بيها في الفريزر وهتكون جميلة جدًا وقت الطبخ. ❤️
👩🍳 طريقة عمل الفاصوليا البيضاء بالتسبيكة:
🫘 أولًا: النقع
انقي الفاصوليا واغسليها كويس، واغمريها في مياه باردة وسيبيها منقوعة حوالي 12 ساعة.ورشه سكر ورشه بيكنج صودا في مايه النقع مستحيل القشرة تفصل
🍲 ثانيًا: السلق
صفي مياه النقع وحطي الفاصوليا في حلة، وغطيها بمياه جديدة. ممكن تحطي بصلة صحيحة متقشرة أثناء السلق علشان الريحة.
سيبيها تغلي حوالي 10 دقايق، وبعدها وطي النار وخليها تستوي بهدوء لحد ما الحبة تستوي تلت اربع سوا وتبقى طرية من غير ما تتعجن.
🥄 شيلي الرغوة اللي بتظهر على الوش، ولو الميه نقصت زودي مياه مغلية فقط.
🍅 ثالثًا: التسبيكة
في حلة تانية حطي شوية زيت أو سمنة، وشوحي بصلة مفرومة ناعم لحد ما تدبل وتاخد لون خفيف.
ضيفي الثوم المفروم وشوحيه ثواني، وبعدها ضيفي عصير الطماطم أو الطماطم المضروبة، ومعلقة أو اتنين صلصة طماطم حسب الكمية.
حطي ملح وفلفل أسود ورشة سكر صغيرة لو الطماطم حامضة، وسيبي التسبيكة على نار هادية لحد ما تتسبك كويس وينزل منها الميه وتبدأ تظهر لمعة الزيت على الوش. ✨
ممكن تضيفي رشة بسيطة كمون حسب رغبتك.
🥣 بعد ما الفاصوليا تستوي، ضيفيها على التسبيكة ومعاها شويه شوربه تدريجيًا لحد ما توصلي للقوام اللي بتحبيه.
سيبيها تغلي مع التسبيكة على نار هادية حوالي 10–15 دقيقة علشان الفاصوليا تتشرب الطعم، ولو بتحبي الصلصة كتير زودي شوية شوربه
و لو عندك معلومه تانية مفيدة أكتبهالنا علشان الكل يستفيد
و لو وصلت لحد هنا خد ثواب الصلاة علي النبي 🌸🥰
و قولولي عايزين أنزل وصفة أيه البوست الجاي 🌸
رمضان حلمي
