انفراد || الاعلامى الدكتور مجدي كامل الهواري يحاور الفنانه دوللى شاهين نجمة لبنان

اهلا و سهلا و مرحبا” بالفنانة الجميلة ( دوللى شاهين ) . نجمة نجوم لبنان .

اهلا بيك دكتور مجدي ،،  و سعيدة جدا انى معاك انهاردة و اتمنى انى اسعد الجمهور الحبيب و أجاوب كل تساؤلاته .

& دوللى كيف تصفين مشوارك الفنى منذ بدايته و حتى الان ؟
&& انا بعتبر انى لسه فى بدايتى الفنية و المشوار لسه طويل .

&  هل تشعرين ان الجمهور يعرف دوللى شاهين الحقيقية ام الصورة التى تقدمها وسائل الاعلام ؟

&&  مش من المطلوب ان الجمهور يعرف كل شئ عن حياتى الحقيقية المهم هو انهم يكونوا عارفين استيلى الفنى عامل ازاى هو دة المهم ، اما دوللى الحقيقية اللى فى بيتها مش المفروض ان حد يعرفه و لا مهم ان حد يعرفه .

&  ما هو العمل الفنى الاقرب الى قلبك و لماذا ؟
&& لا يوجد عمل فنى ااقرب الى قلبى لحد دلوقتى كل اعمالى موجودة داخل قلبى بالتساوى و انا بحب كل اعمالى.

&  الفنانة دوللى شاهين هل ترى ان الفن العربى تغير للأفضل أم للأسوأ فى السنوات الاخيره ؟
&& لاء طبعا الفن العربى اتغير للأسوأ أكيد كل مادا بينحدر اكتر و كل مادا الذوق العام بيتغير للاسوأ دة اكيد و ملحوظ .

& كيف تختارين أدوارك او أغانيك الجديدة ؟
&& ادوارى بختارها على حسب الاسكريبت اللى بيتعرض عليا ، بحب دورى يكون مختلف عن الدور اللى قبله ، بالنسبة للاغانى تكون مختلفه و تكون متنوعه و تكون بتتكلم فى حاجات مختلفة و متنوعة لا يكون فى تشابه فى الاغانى ، لا احب التكرار .

& الفنانه الجميله دوللى شاهين هل تفضلين التمثيل أم الغناء أكثر ؟؟
&& بالنسبالى التمثيل و الغناء بيكملوا بعض ، انا من محبى بصراحة افلام الابيض و الاسود ، اللى فيها كان تقريبا الشخص الاول بيغنوا و يمثلوا زى الفنانه صباح و عبد الحليم ، نجاة الصغيرة ، سعاد حسنى ، كلهم كانوا بيغنوا و يمثلوا يعنى التمثيل و الغناء بالنسبة ليا بيكملوا بعض ، مفيش حاجه احسن من التانية .

& يا ترى ايه اصعب دور قدمتيه فى حياتك الفنية حتى الان ؟
&& اصعب ادوارى كان فى ادهم الشرقاوى لان الشخصية بتتعرض للاختطاف و التحرش بيها فكان محتاج لمشاعر قوية ، افتكر ان دة اصعب ادواري ، لان المشاهد كانت صعبه جدا بجد .

& الفنانة المتألقة دوللى شاهين هل يوجد عمل فنى انتى ندمتى على تقديمه ؟
&& اى عمل اتعرض للجمهور او لم يتعرض للجمهور او اى تجربة ناجحة او فاشله بحس انى اتعلمت منها كتير .  لكن فكرة انى انا اندم ! لاء ما افتكرش ما حصلشى معايا حاجه زى كدا او ندمت على عمل انا عملته..

& من الفنان او الفنانه التى تتمنين التعاون معهم ؟
&&  فى فنانين كتير بحب اشتغل معاهم و ان كان على صعيد الدراما فى فنانين كتير اتمنى اشتغل معاهم ، ان كان احمد عز ، ان كان كريم عبد العزيز ، احمد السقا ، احمد حلمى . لاء فى ناس كتير بحب و اتمنى انى اشتغل معاهم .

& ما رأيك فى انتشار الاغانى السريعة و الترندات الحاليه ؟؟
&&  انتشار الاغانى و التريندات بفلوسك ، السوشيال ميديا اللى بيدفع اكتر بيبقى موجود اكتر ، انا معنديش رأى فى الانتشار دة بصراحة .

&  ما اكثر موقف أثر فى حياتك الشخصية ؟
&& مواقف كتير بتأثر على حياة الانسان الشخصية ، فى محطات ممكن تكون مؤثرة ، لكن حتى الان ثلاثة محطات غيروااا من حياتى او كانوا منعطف فى حياتى ، و هى وفاة والدى اول حاجة و لما بنتى وصلت الدنيا و الموقف الثالث وفاة والدتى مؤخرا .

& الفنانه الرقيقة دوللى شاهين يا تري كيف تواجهين الشائعات و الهجوم عبر السوشيال ميديا ؟
&& انا لا اهتم بالشائعات و لا برأى مين رأيه ايه ، على السوشيال ميديا !! للاسف السوشيال ميديا دلوقتى اى حد مستخبى وراء صوره و اسم ( فيك ) و يقول اللى هو عاوزة و براحته ، فانا مش مجبره انى اخد برأيه لانى ما سألتهوش عن رأيه ! فانا لا اركز فى الحاجات دة اطلاقا اطلاقا .

& دوللى شاهين هل الشهرة اعطتك السعادة أم اخذت منك اشياء كثيرة ؟
&& الشهرة حلوه طبعا” مفيش شك بالعكس هى مش بتدى سعادة و لا بتاخد  سعادة هى حاجة زى الاكتفاء الذاتى كدا ، انت كل ما بتقدم عمل بينجح بيضيفلك شهرة و بيضفلك ثقة بالنفس ، و بيضفلك مسئوليه انك محتاج تعمل حاجه تنجح فيها اكتر كممثل و كمطرب ،  انا بحس ان الشهرة مسئولية ، مش سعادة و انبساط و الكلام دة ، هى مسئولية ، مسئولية كبيره جدا بخلاف اللى بنشوفه دلوقتى ، يعنى المفروض ان الشهرة تخاللى الشخص الفنان يبقى عندة مسئولية اتجاه الناس اللى هى سبب شهرته و يقدم حاجات احسن و افضل .

& ما اكثر صفة بتحبيها فى نفسك ؟
&& اكتر صفة بحبها فى نفسى هى انى لا استسلم ، عنيدة ، بشتغل و بجتهد و بحاول اعمل اقصى ما عندى ، و بحاول ان ما بعطى فرصة للحياة لا توقفنى و لا تكسرنى ، دة احسن حاجه فيا افتكر  يعنى .

&  دوللى شاهين كيف تحافظين على توازنك النفسى وسط الضغوط الفنية ؟
&& يعنى بص هى الضغوط النفسية جوا الفن و برا الفن ، للاسف احنا عايشين فى ظروف كلها صعبة  فالواحد بيحاول على قد ما  يقدر يتعايش و يتأقلم ، طبعا الضغوط الفنية صعبه جدا و بزيادة ، طبعا بسبب الشلاليه و قلة الفرص الموجودة لناس كتير جدا ، فبتخاللى البنى أدم ، اه ممكن يتعرض لمشاكل نفسيه انما انا بحمى نفسى بأنى شخص فرفوش و بنتى  مسليانى و ماليه عليا حياتى ، بدعى كتير و بصلى كتير و بلجأ لربنا كتير و دة اللى بيخاللى البنى ادم لا يكتئب و لا يروح لمنطقة وحشة بسبب قلة الفرص ، يعنى الحمد لله الحمد لله ربنا موجود فى حياتى و بنتى مسهله عليا حياتى فالحمد لله .

& دوللى ،  هل تعرضتى لمحاربه داخل الوسط الفنى ؟
&& أه تعرضتى لحروب كتيره داخل الوسط و مازلت اتعرض ، لكن كل دة الحروب دة لا تؤثر في .

& هل هناك من حاول استغلال اسمك او نجاحك ؟
&& ناس كتير بتحاول تستغل اسمك و تتسلق عليك الفنان صعب يعرف مين اللى بيحبة و مين اللى مش بيحبه ؟ من الصعب جدا من الصعب يعرف مين بيتمنى ليه الخير و مين واقف ليه على الواحدة ، صعب احنا فى وسط صعب جدا فالعادي هو الاستغلال سيد الموقف زي ما بيقولوا يعنى .

& دوللي إيه رأيك في الانتقادات التي تربط الجمال بنجاح الفنانة؟
&& عادى من الطبيعى ان الجمال بيكون من اهم اسباب نجاح اى فنانه ، لكن بعد كدا لو مفيش موهبه ، لو مفيش ثقافة ، الجمال مش هيفيد بأى حاجه ، علشان خلاص البنات حلوين و كل البنات حلوين و مع عمليات التجميل اللى بقت منتشرة بزيادة حتى ما بين الناس العادية ، و اى واحدة حلوه و اى واحدة عندها المطلوب ، لكن اهم من الجمال بعد كدا انها تثقف نفسها فنيا” و انها تتطور فنيا و ان يكون عندها الموهبه و تثقلها صح 

& يا ترى هل السوشيال ميديا أصبحت تتحكم في نجاح الفنان؟
&& طبعا السوشيال ميديا سبب من اسباب النجاح و زى ما قلت لك يا دكتور مجدي ، على قد ما تصرف على نفسك فى السوشيال على قد ما هتنجح و على ما هتصرف على الترندات ، طبعا السوشيال ميديا هى اللى بقت دلوقتى متحكمه فى كل حاجه .

& هل ممكن أن تعتزلي الفن يومًا ما؟ ولماذا؟
&& لاء مش ممكن اعتزل الفن فى يوم من الايام دة الشغل اللى انا بحبه ، يعنى زى ما انت صحفي ، هل هتعتزل الصحافة طبعا لاء ؟ لكن هتوصل لوقته و تطلع على المعاش و انا هوصل لوقته و خلاص ابتدى تدريجيا انسحب بسبب العمر ، لكن مش اعتزال بمعنى الاعتزال الا بعد عمر طويل ان شاء الله ..

ربنا يديكى طوله العمر و نشوف ليكى اعمال تبدعى فيها و تمتعى جمهورك اللى بيحبك .

& دوللي إيه أكثر أكلة لبنانية بتحبيها؟
&& اكتر اكله لبنانية بحبها جدا هى الفتوش .

& بلد تتمنين العيش فيه لفترة؟
&& البرازيل طبعا . 

&  لو لم تكوني فنانة.. ماذا كنتِ ستصبحين؟
&& لو لم اكن فنانه كنت هبقى فنانه .

& أكثر شيء يزعجك أثناء التصوير؟
&& هو حتى الان لم يحدث اى شئ يضايقنى اثناء التصوير ، عموما يعنى لو لم نكن محضرين العمل صح ، يعنى لو فى التمثيل مثلا” ان فنان يكون غير حافظ ، يعنى جاى التصوير غير حافظ ! فنضطر اننا نعيد مرة و اتنين و عشره و عشرين بسبب ان فنان مش مذاكر مثلا ، او فنانه مش مذاكرة ، دة اكتر حاجة ممكن تضايق اى حد مش بس انا يعنى .

& كلمة تصف بها دوللي شاهين نفسها؟
&& جبل ! مفيش حاجه ممكن تكسرنى .

& هل الفن اليوم يحتاج موهبة أم علاقات؟
&& دلوقتى الفن محتاج علاقات طبعا ، مش محتاج موهبه ، انت عندك علاقاتك زى الفل ، فى فلوس ، فى علاقات زى الفل ، مش محتاج موهبه خالص .

& ما رأيك في المنافسة بين الفنانات العربيات؟
&& المنافسة لطيفة اكيد يعنى ، معرفش ! اكيد لطيفة .

& هل تعرضتِ للظلم الإعلامي؟
&& اه تعرضت للظلم الاعلامي الى حد” ما اكيد .

&  كيف ترين مستقبل الدراما العربية؟
&& الصراحة مش قادرة اشوف مستقبل دلوقتى مع اللى بيحصل حاليا فى الدراما ، مش قادرة اتخيل المستقبل هيبقى عامل ازاى ! بتمنى ان الدنيا تتحسن و يبقى فى فرص اكتر و اتمنى ان الموضوع يرجع زى زمان لكن لاء معنديش رؤية حاليا لاء !

& ما المشروع الذي تحلمين بتقديمه ولم يتحقق بعد؟
&& فى مشاريع كتير بتمنى ان انا اعملها فى مشاريع كتير كتير بحلم انى اعملها و على رأسها الفوازير او عمل استعراضى او فيلم استعراضى .

& هل تشعرين أن الجمهور تغيّر في طريقة تقييم الفنانين؟
&& كل حاجه اتغيرت فى تقييم الفنانين . السوشيال ميديا هى اللى بتقيم الفنان ، قد ايه هو بيصرف على السوشيال ميديا ، قد ايه هو بيقدر ان هو يخللى تقيمه كفنان هو الاعلى ، مش بالجمهور ، مش الجمهور هو الحكم ، مش زى زمان انت بتقدم العمل و بتنتظر رد الفعل عليه ، لاء انت بتقدم العمل و بتصرف عليه علشان ينجح و انت اللى بتعليه و انت اللى بتوصله للناس غصب عنهم و ليهم فخلاص انت بتفرض نفسك ، ما بقاش فى المقاييس و المعايير بتاعت زمان .

& النجمة اللامعة دوللى شاهين فى نهاية اسئلتنا انهاردة ، ما هى الرسالة التى تحبين توجيهها الى المرأه العربية ؟
& انها تحب نفسها اوى بزيادة ، انها تثق بنفسها ، انها تعرف ان عندها قدرات عالية جدا ، و ان تجتهد و تثقف نفسها و تسعى و تشتغل على نفسها لانها عندها قدرات كتير جدا و تقدر تحقق كتير جدا .

& فى نهاية الحوار بشكر الفنانه الجميلة المتألقة دوللى شاهين اللى فتحت قلبها و تحملت أسئلتنا و اتمنى ليكى النجاح و التوفيق .

&& انا اللى بشكرك دكتور مجدي و سعيدة انى كنت معاك انهاردة و بشكرا جدا لاتاحتك الفرصة لى انى  ااقول لجمهوري الحبيب  انى بحبهم جدا و اتمنى ان اعمالى ، تليق بيهم و اتمنى انها تعجبهم و دة اهم حاجه بالنسبه ليا طبعا ، و سعيدة انى كنت معاك انهاردة . تحياتى