ملف كامل لكل نواعم العيد بكل التفاصيل عشان يطلع احلي من الحلواني وبالمقادير المضبوطة 👌
اول حاجه نتكلم عن طريقه الكعك ع البارد
عمرك سألتي نفسك ليه الكحك على البارد خفيف جداً على المعدة وسهل و يشبه كحك الحلوانية الجاهز 🤔

طيب إزاي بيبقى دايب و ناعم و في نفس الوقت الكحكاية ماسكة نفسها 🤔
طيب إزاي الكحك على البارد مش بينفش في الفرن و كمان ما بيشققش 🤔
و إزاى الكحك المحشي و معمول على البارد مش بينفجر في الفرن و بيطلع سليم زي ما دخل تمام 🤔🤔
تعااالوا يا قمرات نجاوب على كل الأسئلة دي و نعرف طريقة الكحك على البارد بكل الأسرار اللي ما حدش بيقولها 🤗🤗

👈 أولاً الكحك مش بيتخمر أبداً لأننا لو خمرناه هيقلب قرص 😒
تشكلي الكحك و تدخليه الفرن على طول و اللي ما دخلش الفرن يدخل التلاجة بسرعة علشان نوقف عملية التخمير و أول ما تطلعي الصاج إللي جوه الفرن بعد ما يستوي هتدخلي اللي في التلاجة و هكذااا لحد ما تخلصي كل الكمية ✌️ أتفقنا 😘

👈 الكحك يعنى سمنة مفيش كحك يتعمل بالزبدة و السمنة هنا حسب مقدرتك المادية و الصحية
لو عملتيه بالسمنة البلدي تمااام جداً و لو عايزة تعمليه بسمنة ميكس بين البلدي و النباتي برضه تمام جداً
و لو عايزة تعملية بسمنة نباتي فقط زي جنة النيوزلاندي اللي نازلة في السوق و ريحتها و طعمها شبه البلدي جداً برضه تمام جداً ✌️✌️

👈 أرجوكي أستعملي نوع دقيق محترم و هقولك أمثلة
( سنبلة الفرات / أو الكوثر)
بلاش الدقيق مجهول المصدر و لو مصممة تشتري دقيق سايب من عند العطار أو محلات مستلزمات الحلواني يبقى لازم يكون دقيق مخصص للكحك والبسكوت
يكون دقيق ضعيف مش بيعمل عرق
(( الدقيق اللي بيعمل عرق زي الدقيق اللي بنستعمله للعيش))

👈 كيلو الدقيق بنحطله نصف كباية مايه فقط فقط و نلم العجين لم مش ببنعجنه خااالص
ولو حابينه مش ناعم اوى أو متماسك شوية يبقى كوب الا ربع لكوب مش اكتر أقصى كمية ماية تتحط هى ٢٠٠ مللي بسسس

الكحك مش بيتعجن الكحك بيتبس فقط
بسي الدقيق مع السمنة مهلك أوي
فى مرحلة البس دي خدي وقتك أوووي و بسي بضمييير
لو عاوزة كحك صح يبقى متستعجليش
لو مفيش عجان أو مضرب يبقى بين كفين إيديكي و بسي وافركيه كويس بين كف اليد

👈أول ما نضيف السوائل نلم العجين بس ليس إلا مش بنعجن مش بنعجن تانى بنلم لحد ما الماية تختفى وشكراً جداً

👈 بتضربي السمنة الأول وهي باردة وتخلي قوامها يهيش ويفتح لونها وممكن بالمضرب اليدوى طبعاً بس شدى حيلك عليها شوية

متعجنيش الكحك بلبن بيقصر عمره اعجنيه بمايه افضل كتير السوائل بصفه عامه هي اللي بتتحكم في دوبان الكحك قللتي سوايل الكحك دايب كترتي سوايل الكحك هينشف منك

البيكنج بودر بنستخدم ربع ملعقة فقط و لو زودتي البيكنج باودر النقشة هتروح وهيفرش منك فى الفرن
لو هتضيفي خمير هتبقى الخميرة نفس مقدار البيكنج باودر ربع ملعقة صغيرة

نيجي بقي لتسوية الكحك على البارد
تسوية الكحك اللي على البارد هتكون على درجة حرارة 180 درجة في الرف الأوسط علشان إحنا عايزين الكحك يستوي علي مهله من جوه
و لازم تتابعي الكحك لحد ما ياخد اللون الذهبي من تحت و لو حابة تفتحي الشواية دقيقتين مفيش مشكلة ✌️

👈 الكحك المحشى هنسويه على درجة حرارة 200 درجة
في الرف اللى فى النصف برضه علشان الحشو ما يغليش بداخل الكحك و ينفجر
🌼 بعد ما عرفنا أسرار نجاح الكحك على البارد
عايزين نعرف المقادير 😊

مقاديرالكحكعلى_البارد

🍪 كيلو دقيق
🍪٥٥٠ جرام سمنة
🍪 ٣ معالق سكر بودر
🍪 ٣معالق سمسم محمص
🍪 رشة ملح
🍪 ربع معلقة صغيرة بيكنج بودر
🍪 ربع ملعقه صغيره خميرة
🍪 نصف كوب ماء دافئ
🍪 ريحة كحك اختيار
الطريقه 👇
🥮 أضربي السمن بالمضرب أو بإيديكي لحد ما لون السمنة يفتح جداً و قوامها يهيش و يبقي كريمي

🥮 أنزلي بكل المقادير الجافة وهاتك يا بس بإيدك أو بالعجان بالمتاح عندنا ناخد وقتنا براحتنا لحد ما الدقيق يتشرب السمنة ويبقى العجين أشبه بعجين البيتيفور والبسكوت
🥮بعد كده ننزل بالماية ونلم العجينة بس مش بنعجن لحد ما الماية تختفى
نختبر العجين وناخد قطعه وبالبصامة لو مشققتش نشتغل على طول
ولو مشيتوا على الخطوات دى استحاله تشقق ✌️
🤔طب لو شققت نشتغل برضوا بس كل قطعه عجين ناخدها و نكورها بين ادينا لحد ما قوامها يظبط يعنى نحنن قطعه قطعه من العجين

الغريبه_الناعمه

و علشان تبقى ناعمة بجد يبقى لازم تتعمل بالسمن 👌👌
الغريبة مش بتتعمل بالزبدة أبداً 😊
ا
ودائما اعرفوا ان الدقيق ضعف السمنة 🥠🧑‍🍳

المقادير بسيطة جداً ومفيش اسهل من كده 👇
🍩 كوبايتين دقيق
🍪و كوب سمنة
🍩 ونص كوب سكر بودر لازم يكون منخول بعد الطحن
🍪 وفانيليا
بسسس كدة

و لكن خلي باااالك🤗

السمنة لازم تكون من الثلاجة بس مش مجمدة نحط عليها السكر نضربهم بالمضرب كويس جداً لما الخليط يبقى كريمي وبعدين نضيف الفانيليا ف اخر مرحلة للخفق 👌ثم ننخل الدقيق وننزل بيهم على خليط السمنة ونقلب لحد مالدقيق يختفي يادوب بس نلم العجينة مش نعجن ❌️
بتكون بتلزق شوية وناعمة خالص ونسيبها ترتاح شوية في الثلاجة ربع ساعة وبعدين نشكلها على شكل كور ولو عاوزين تزينو الوش ممكن لوز او لولي فضي او قرنفل مسمار او سوداني اي مكسرات تحبوها ندخلها الثلاجة بعد التشكيل علشان ماتفرش في الفرن درجة حرارة الفرن هادية عشر دقايق بس، مش بتاخد لون تخرج من الفرن ماتحركهاش خالص لحد ماتبرد

ملحوظة مهمة أووي للغريبه👌

👈لو ذاد السكر فى عجينة الغريبة بتنشف علشان كدة قللي السكر
👈-الغريبه مش بيتحط فيها ولانشا ولا بيض ولا بيكنج بودر

👈وانتي بتشتغلي في الغريبه لو حسيتي ان العجينه فرولت منك طريها بين ايدك هترجع طريه ومش هتشقق

نقول كمااان 😂
🛑الغريبه لو فرشت 👈يبقا سمنه زياده
🛑لو شققت 👈يبقا دقيق زياده
🛑لو لزقت في ايدك أثناء التشكيل 👈 يبقا تتحط في الثلاجه شويه
🛑نشفت =👈يبقا سكرها زياده 👌
بالهنا والشفا ❤️

طريقةعملالبتيفور

بتيفور اللبن البودرة 👌 وصلنا لسر البتيفور 👏👏
بتيفور أشهر المحلات بكل أسراره 👌👌
دايب و طعمه غير أي بتيفور عملتيه في حياتك 😍😍
هنشتغل بكيس الحلواني القماش الأبيض ✅

المقادير

و قبل ما نقول المقادير خلينا متفقين إنك لازم يكون عندك ميزان مطبخ علشان الوصفة الصح بتتقال بالجرامات لأن مفيش كبايتين في مصر ليهم نفس الحجم و السعة ☺️

👈 750 جرام من الزبدة طرية بدرجة حرارة الغرفة
👈 80 جرام من اللبن البودرة ( نص الكباية المعيارية)
👈320 جرام سكر بودرة يعني كبايتين من الاكواب المعيارية
👈 4 بيضات (3كاملين و1صفار بس)
👈 فانيليا سايلة أو فانيليا بودر
👈 كيلو دقيق منخول ولازم يكون دقيق مكتوي عليه مخصص للكحك و البسكوت
👈 مع رشة ملح
👈 ملعقتين كبار من الكاكاو الخام االغير مُحلى

الطريقة

أضربي الزبدة مع السكر كويس جداً و يُفضل إنك تنخلي السكر البودرة قبل إستخدامه لأن أوقات بيبقي فيه كلاكيع و شوائب
لازم توصلي للون الفاتح والقوام الهش الكريمي و الخطوة دي أهم خطوة يا جماعة 👌👌
هننزل بالبيض بيضة بيضة بالتدريج اثناء الضرب و هنضيف طبعاً الڤانيليا.
دلوقتي هنبدأ نضيف كيلو الدقيق بالتدريج شوية شوية
هنضيف اللبن البودرة و نلم العجينة لم بصوابعنا مش هنعجن
اقسمي العجينة نصفين و خدي نص العجين و ضيفي ملعقتين الكاكاو الخام و لم العجين لم لحد ما الكاكاو يختفي و مش هنضيف زبدة زيادة هنكتفي بالزبدة إللي حطيناها في الأول.
هنبدأ نشكل البتيفور بكيس الحلواني و أنا أستخدمت الكيس الكتان القماش لأنه متين و بيستحمل و بيتغسل و هيفضل معاكي سنين
رقم التيب اللي استخدمناه 7ft او 6
حضري صاج الفرن و إياكي تدهنيه عايزينه كده بدون أي مواد دهنيه.
سخني الفرن و انتي بتشكلي البتيفور
دخليه الفرن في الرف الأوسط على درجة حرارة 180 درجة لمدة 15 دقيقة لحد ما تحركي الصاج تلاقي البتيفور بيروح و ييجي معاكي 👌
للتزيين هندوب شيكولاتة خام في حمام مياه و كمان شيكولاته بيضاء
هنلزق بتيفور الڤانيليا في بعض بمربى المشمش و نغطسه في الشيكولاته البيضاء و بعدها في السوداني المجروش
و نلزق بتيفور الشيكولاتة بالشيكولاتة سهلة الفرد و نغطسه في الشيكولاته اللي دوبناها في حمام المياه و بعدها في الفستق المجروش
و دي مجرد أفكار للتزيين و أنتي و ذوقك و أمكانياتك
و بس خلاص 😍 عندنا أحلى و أشيك طبق بتيفور بنفس طعم أفخم محلات الحلواني ❤️

طريقةبسكوتالعيد_الإقتصادي

البسكوت ده حرفياً أسهل و أنجح بسكوت للعيد و للأيام العادية كمان 😍
بدون عجان و بدون زبدة و في منتهى الطعامة و السهولة 👌👌

المقادير

👈 نص كيلو من دقيق الكحك و البسكوت ما يُعادل 500 جرام
هنشيل منهم ملعقتين كبار من الدقيق

👈 هنحط بدالهم ملعقتين كبار من الكاسترد أو النشا
👈 رشه ملح
👈 ملعقة صغيرة بيكنج بودر
👈 عدد ٢ بيضة
👈 رشة فانليا
👈 كباية سمن على زيت بما يعادل 200 جم ( ممكن سمنة فقط لكن لازم تكون بحرارة المطبخ)

👈 تلت كباية من اللبن الدافي بما يعادل 80 مللي و ممكن نستبدله ب عصير برتقال
👈 ملعقة صغيرة من النشادر

👈 كباية إلا ربع من السكر الحبيبات بما يُعادل 150 جرام و ممكن نستبدله ب سكر بودر عادي

نيجي بقى #للطريقة

👈 في بولة عميقة أخلطي كل المكونات الجافة إللي هما الدقيق و البيكنج بودر و النشا أو الكاسترد مع رشة الملح.

👈 هاتي اللبن الدافي و حطي عليه النشادر.

👈 هاتي الخلاط و حطى فيه كل المكونات دى
( البيض _ والسكر _ والفانليا _ والسمنه والزيت _ والحليب مع النشادر)
و أضربي كويس جداً لحد ما يتكون خليط ناعم

👈 أنزلي بيه على خليط الدقيق ونقلب لحد ما يبقى عندنا عجينة طريه لينه
👈 نيجي بقى لتشكيل البسكوت إللي ديماً عليه خلافات 😎التشكيل ينفع بكيس الحلواني أو بالماكنة عادى جداً

👈 التسوية
هنسوي البسكوت على حرارة اقل من المتوسط
على 180 درجة مئوية على الرف اللي في النص لمدة 20 دقيقة أو لحد ما ياخد اللون الذهبي الجميل ده
و بألف هنا و شفا ❤️

ايدي وجعتني من الكتابة 😔 دعوه حلوه منك وشيرلاصحابك وحبايبك
وكل عام وانتم بخير 🎉
اي سؤال او اي حاجه مش واضحه اكتبلي وارد عليكي 💓
صلي على النبي محمد صلى الله عليه وسلم في التعليقات ❤️