مقادير وطريقة البيتزا بالتفصيل 😍♥️
المقادير:
- 2 كوب دقيق
- 1/4 كوب حليب بودرة
- 1/3 كوب زيت
- ماء دافي للعجن (يُضاف بالتدريج حسب نوع الدقيق)
- 1 معلقة صغيرة خميرة فورية
- 1 معلقة كبيرة سكر
- 1/2 معلقة صغيرة ملح
الحشو (اختياري حسب الرغبة):
- فلفل أخضر
- زيتون
- صلصة بيتزا أو كاتشاب
- جبنة موتزاريلا
- أي حشوة تفضليها (فراخ، سلامي، سلامي، ميكس جبن،…)
طريقة التحضير:
- في بولة، اخلطي الدقيق مع الحليب البودرة، السكر، الملح، والخميرة.
- ضيفي الزيت وقلّبيهم كويس، وبعدين نزّلي بالمية الدافية تدريجي وابدئي تعجني لحد ما العجينة تلم وتبقى طرية ومتماسكة.
- ادهنيها بزيت خفيف، وغطيها بفوطة وسيبيها تخمر في مكان دافي حوالي ساعة.
- افردي العجينة على رخامة مرشوشة دقيق بالنشابة، وادهني صينية البيتزا بالزيت ورشي دقيق بسيط او سميد.
- حطي العجينة في الصينية وسيبيها تستريح 10 دقايق، بعدها شكشكيها بالشوكة واضغطي عليها بأطراف صوابعك.
- افردي طبقة صلصة، ورصي الحشوة اللي تحبيها (مع رشة جبنة موتزاريلا بسيطة عشان تمسك الحشو).
- ادهني الأطراف بزيت بسيط، وادخليها فرن سخن على درجة حرارة عالية لمدة 10 دقايق لحد ما الاطراف تبدا تحمر.
- طلعيها وزودي جبنة الموتزاريلا على الوش، ودخليها الفرن تاني لحد ما الجبنة تسيح وتاخد لون دهبي حلو.
نصيحة:
عشان الموتزاريلا تسيح وتمط معاكي لازم تكوني مطلعاها من الفريزر قبل الاستخدام بساعتين لحد ما تفك وتبقى طرية.
بالهنا والشفا ♥️
منال سعيد
