بسكوت البرتقال المقرمش 🍊✨

بسكوت ريحته وطعمه تحفة
ملحوظة:
الكوبايه اللي هنستخدمها نعاير بيها كل المقادير.
المقادير:
1 كيلو دقيق
كوب ونصف سمنة (طريه مش سايحة)
نصف كوب زيت
كوب ونصف سكر بودرة
4 بيضات
نصف كوب عصير برتقال
معلقة كبيرة مليانة بشر برتقال
(ممكن نستبدله بكيس فانيليا برتقال)
معلقة صغيرة مليانة بيكنج بودر
نصف معلقة صغيرة نشادر
كيس فانيليا
الطريقة:
أول خطوة هنضرب السكر مع السمنة كويس جدًا بالمضرب الكهربائي لحد ما يبقوا كريمي.
بعد كده نضيف البيض بيضة بيضة ونضرب كويس، ونضيف كيس الفانيليا وبشر البرتقال.
نضيف البيكنج بودر على الدقيق ونقلبهم، وبعد كده ننزل عليهم خليط السمنة والبيض.
في نص كوب عصير البرتقال نقلب فيه النشادر كويس، ونضيفه على الدقيق، ونقلب كل المكونات لحد ما تتجمع معانا من غير عجن كتير… بس نلم العجينة.
نغطي العجينة بكيس ونسيبها 10 دقايق ترتاح.
نجهز ماكينة البسكوت ونركب الشكل اللي فيه سنون، ونحط جزء من العجينة ونرص البسكوت في صواني ألمونيوم من غير دهن.
التسوية:
نسخن الفرن كويس جدًا.
ندخل البسكوت على 180 درجة في الرف الأوسط أول 10 دقايق، وبعد كده نوطي الحرارة لـ 170 لحد ما ياخد لون دهبي من تحت.
غالبًا مش هنحتاج نشغل الشواية وهيتحمر لوحده، لكن كل شوية نلف الصينية في الفرن. ولو احتاج لون بسيط ممكن نشغل الشواية ثواني.
هيكون معاكي أحلى بسكوت مقرمش وريحتُه وطعمه خطير 😍
لما يبرد تمامًا نحفظه في علبة محكمة الغلق.

متنسوش صلو على الحبيب المصطفى 💚 🌹 ☘️ 🌹 ☘️ 🌹 ☘️