⭕ ليه الغريبة بتشقق منّى ؟ 🤔
⭕ أو ليه بتسيح وتفرش فى الصنية ؟ 🙄
سؤالين بيجولى كتير جدا .. 😁
⚫ الأول لازم نفهم تكنيك خبز ومكونات الغريبة وبعدما هنعرف إجابات كل الأسئلة.
- الغريبة زى اى مخبوزات فيها مواد جافة ومواد سائلة .. اللى هى مادة العجن
- المواد الجافة بتكون الدقيق والسكر البودرة والمواد السائله بتكون السمنة وبس 😁 لأن الغريبة ماينفعش يدخل فى مكوناتها اى مية عشان كده الزبدة لا تصلح نهائي لأنها هاتنشفها وتخليها حجر.
- شرط أساسي العجينة تكون ساقعة وده مش هيحصل إلا لو كانت السمنة هى اللى ساقعه عشان هى المكون الأساسى للقوام بتاعها
- بعد ما بعجن وبشكل وبرص الغريبه لازم أدخلها التلاجة على الأقل ١٠ دقايق على ما الفرن يسخن ، عشان السمنة بتكون سخنت وساحت من حرارة ايدينا أثناء عملية التشكيل.
- الفرن بتاعنا يكون مظبوط على درجة ١٥٠ مش اكتر ولا أقل ، وندخلها من التلاجة على الفرن مباشرة.
♨️ ولاااازم نجرب الأول فى واحدة أو اتنين بس عشان نظبط عليهم باقى المقدار.
🔵 طيب لو دخلت وساحت وفرشت ؟
◾يبقى زى ما قلنا السمنة سخنة ولازم تبرد وتدخل التلاجة✋
◾ مقدار السكر زيادة عن اللزوم
🔵 طيب لو دخلت وشققت ونشفت ؟
◾يبقى حاجة من تلاتة مالهومش رابع..
١- الفرن حرارتة عالية فالطبقة الخارجية استوت اسرع من قلبها ، والقلب لسه جواه سوائل بتتبخر فابتشقق السطح الخارجى اللى استوى عشان تخرج منه
٢- كمية الدقيق كتيرة على كمية السمنة ، فابيخليها يابسه وجافة وتتشقق وفى الحالة دى بنزود كمية السمنة شوية.
٣- السمنة سخنه جوه العجينة وده برضوا سبب ممكن يخليها تشقق ، فابندخلها التلاجة ربع ساعة تمسك نفسها وعلى الفرن على طول.
طيب كل حاجه والمقادير مظبوطة وبقت ناشفه وبتقرمش ؟
ده سوى زيادة … الغريبة تخرج لونها فاتح مانستاش لما تبتدى تصفر وتنشف
لازم متاخدش لون من تحت نهائي لونها بيكون فاتح بدون لون
ممنوع تحركيها من الصينية الا لما تبرد تماما 💯
وأخيراً بالنسبة للمقادير
نصف كيلو من الدقيق بياخد ٣٠٠ جرام سمنه اعملى خليط بين السمن الجاموسى البيضا والبقرى الصفرا
والسكر 150 جرام مطحون ومنخول عشان تتاكد ان ناعم جدااا
زامنا بكل التكات دى هتطلع معانا انعم وانجح غريبه .. وكل سنة وانتم طيبين 😁 🥰
منال سعيد
){kind=link}
