المؤتمر الصحفي اللي حصل من شوية في واشنطن ما بين ترامب ونتنياهو، هيذكره التاريخ بعد كده باعتباره كان بداية النهاية لشكل الشرق الأوسط القديم كما نعرفه..

ترامب المرة دي محاولش انه يلف ويدور، ولا يتعامل بالسياسة.. لأ جابها وش كده، بتصريحات أقل ما يقال عنها هو انها وعد بلفور جديد..

الفلسطينيين هيمشوا من القطاع يعني هيمشوا.. ومفيش قدامهم خيار تاني.. فإما الخروج أو الموت.. وبعد خروجهم، مفيش عودة تاني لأرضهم خلاص، عشان لو فكروا يرجعوا هيتضربوا تاني ويموتوا..

ولو مش فاهم معنى الكلام، فالكلام باختصار يعني ان الخطة الحقيقية بقت مكشوفة ومش مكسوف ولا خايف يتكلم عنها في العلن.. طرد ال 2 مليون فلسطيني كلهم وإخلاء القطاع بالكامل من سكانه، مش كام ألف زي ما كان بيتقال قبل كده.. وتوسيع مساحة اسرائيل العظمى.. بالظبط زي ما كان بيقول قبل كده: “اسرائيل صغيرة أوي، ومحتاجين نكبرها شوية”..

وبعد ما الفلسطينيين يمشوا، أمريكا هي اللي هتسيطر على القطاع.. مش اسرائيل.. وبنسبة كبيرة ممكن يبعتوا قوات هناك بشكل مباشر، عشان تتولى مهمة القضاء تمامًا على حماس.. وبعدين هما اللي هيتولوا عملية إعادة إعمار القطاع وتطويره، وتحويله لمنتجعات وأماكن سياحية على أعلى مستوى..

ولما صحفي سأله هيستولي على القطاع بشكل عامل ازاي، قال نصًا كده: “نخطط لأن يكون ذلك كملكية دائمة Permanent Ownership”.. يعني أمريكا هي اللي هتحتل القطاع وتمكن اسرائيل منه..

تاني أكد على كلامه ان مصر والأردن هيقبلوا سكان من غزة، وانهم مش هيرفضوا طلبه.. ممكن يرفضوا طلب من بايدن، لكن هو لأ.. بمنتهى العجرفة والعنجهية كده، كإنه نصب نفسه إله على البشر..

طبعًا نتنياهو كان قاعد مبسوط جدًا بكلام ترامب، وعمال يضحك وباين على وشه الانبساط.. وبعد المؤتمر ده قال على ترامب انه اهم صديق لإسرائيل في تاريخها كله..

ترامب خلال المؤتمر كمان قال انهم بيناقشوا الإقرار بسيادة اسرائيل على الضفة الغربية.. يعني فلسطين هتختفي تمامًا من على الخريطة..

زي ما انت شايف، الموضوع كده دخل في منعطف صدامي بشكل مباشر، ومفيش معاه حل غير الاتحاد والثبات على الموقف بشكل كامل.. خصوصًا وان ترامب مش فارق معاه ولا هامه كلام الدول.. وبالفعل انسحب من الأنوروا ومجلس حقوق الانسان في الأمم المتحدة، عشان شايفهم بيعادوا السامية!

مصر بالفعل أعلنت انها مش هتتنازل عن حقوق الشعب الفلسطيني وعدم المساس بأرضه، ورافضة فكرة التهجير رفض قاطع.. والخارجية السعودية كمان طلعت بيان قوي جدًا قالت فيه انها رافضة فكرة تهجير الفلسطينيين شكلًا وموضوعًا، وان المملكة مستحيل تقيم علاقات مع اسرائيل بدون اقامة دولة فلسطينية مستقلة..

معناه اننا بنعيش الأيام الأخيرة في وسط الشكل القديم للمنطقة العربية.. وان اللي جاي مش هيكون زي اللي فات إطلاقًا..

خريطة الشرق الأوسط على وشك انها تتغير للأبد.. وخلال الكام يوم الجايين، هتبقى فرصتنا الأخيرة اننا نبص على شكلها دلوقتي قبل اللي هيحصل.. ف يا إما فلسطين تختفي تمامًا، يا إما الضغط العربي والثبات على الموقف يحصل ويتم الاعتراف بدولة فلسطينية مستقلة عاصمتها القدس الشرقية.. وده للأسف صعب جدًا يحصل، لانه معناه بداية نهاية الكيان..

فبالتالي مفيش غير حل من اتنين.. يا اما القبول بالتهجير، يا اما الصدام المباشر.. عسكريًا واقتصاديًا.. ومصر بالفعل حشدت قوات ضخمة عند الجانب المصري من مدينة رفح، مباشرة على الحدود..

ف يا ترى ايه اللي هيحصل؟!

الله أعلم.. بس الأيام اللي جاية لازم تبقى مستعد، عشان الظروف هتبقى أصعب بما لا يقاس.