رمضان حلمي
النهاردة شهادة ميلاد لنجم دراما كبير هيكتم كل الألسنة اللي راهنت على فشل موهبته من البداية، أظن إخواتنا اللي عاملين نفسهم نقاد فنيين محدش فيهم هيقدر يتكلم بعد حلقة علي كلاي النهاردة.
الفنان اللي يقدر يوصل الجمهور لحالة حقيقية من الحزن والفرح هو اللي يقدر بفنه وموهبته يغير مشاعرك في لحظة ويخليك تصدقه، وتحس إنك قدام مشهد حقيقي إنت عايشه فعلاً ومتأثر بيه مش دور في مسلسل بيتعمل في موسم ومحدش هيسمع عنه تاني.
كل اللي كان بيشكك في مسلسل علي كلاي، واتهموا إنه بينجح عشان خاطر المسابقات والإنتاج والبلاهة بلاهة يعني كلام لا يودي ولا يجيب، ياريت تقولولنا رأيكم النهاردة، لأنكم بتابعوا المسلسل زينا بالظبط.
من أول حلقة في المسلسل، والكل بيتابعه لأنه بالبلدي كده مسلسل شارع، وبتمثيل الغول أحمد العوضي قدر يقنع كل بيت في مصر إنه نجم دراما كبير ومن الصف الأول لا يختلف عن نور الشريف ولا محمود عبد العزيز في جيلهم.
الدراما لعبة العوضي، من كام سنة واللي مش مقتنع يدخل يجيب أرقام المشاهدات وهيتأكد بنفسه.
احترموا موهبة العوضي، وادولها حقها، عشان نكون منصفين فالـ10 سنين الجايين في الدراما المصرية هيكون متربع على قمتها نجم واحد بس اسمه أحمد العوضي
